Monday, August 10, 2015

കുങ്കുമപൂവിന്റെ നാട്ടിൽ


കശ്മീരിലെ കുങ്കുമപ്പൂക്കളുടെ നാടായ, 'സഫ്രോണ്‍ സിറ്റി' എന്നറിയപ്പെടുന്ന പാമ്പൂരിലൂടെയാണ് യാത്ര. കണ്ണെത്താ ദൂരം പരന്നുകിടക്കുന്ന കുങ്കുമ പാടങ്ങൾ. കുങ്കുമത്തിന്റെ വിളവെടുപ്പ് സീസണല്ലാത്തതിനാൽ പൂക്കൾ വിരിഞ്ഞുനിൽക്കുന്ന കാഴ്ചയൊന്നും കണ്ടില്ല. കുങ്കുമ കിഴങ്ങുകൾ നടാനുള്ള നിലമൊരുക്കുന്ന തിരക്കിലാണ് കർഷകർ. പലയിടത്തും കുടുംബാംഗങ്ങൾ ഒരുമിച്ച് കൃഷിപ്പണി ചെയ്യുന്ന കാഴ്ചകൾ. കശ്മീരിൽ എവിടേയും പട്ടാള സാന്നിധ്യമുള്ളപോലെ കുങ്കുമ പാടങ്ങളിലും തോക്കേന്തിയ പട്ടാളക്കാരെ കാണാം.


മണ്ണ് നന്നായി ഉഴുത് സൂര്യ പ്രകാശം നേരിട്ട് കിട്ടുന്ന സ്ഥലത്ത് വേണം കുങ്കുമ കിഴങ്ങ് നടാൻ. ഓഗസ്റ്റ് - സെപ്തംബർ മാസത്തിൽ കിഴങ്ങുകൾ പാകും. നവംബർ - ഡിസംബർ മാസത്തിൽ പൂക്കാൻ തുടങ്ങും. ആദ്യം മണ്ണിൽ നിന്നും പുറത്തേക്ക് വരുക പൂക്കളാണ്. വൈകുന്നേരം പുഷ്പിച്ചാൽ പിറ്റേ ദിവസം തന്നെ പൂക്കൾ വാടിപ്പോകുന്നത് കൊണ്ട് പ്രഭാതത്തിൽ തന്നെ പൂക്കൾ വിളവെടുക്കും. വയലറ്റ് നിറമുള്ള പൂക്കളിൽ 6 കേസരങ്ങൾ ഉണ്ടാകും. മൂന്നെണ്ണം മഞ്ഞയും മൂന്നെണ്ണം ചുവപ്പും. ചുവപ്പ് നിറമുള്ള കേസരങ്ങൾ ഉണങ്ങിയതാണ് യഥാർത്ഥ കുങ്കുമ നാര്. വാണിജ്യ പ്രാധാന്യമുള്ള കുങ്കുമച്ചെടിയുടെ ഏക ഭാഗം  പൂവിലെ വളരെ ചെറിയ ഈ നാരുകൾ മാത്രമാണ്. ഒരു ഗ്രാം കുങ്കുമ നാര് ലഭിക്കണമെങ്കിൽ 150 ഓളം പൂക്കൾ പറിക്കേണ്ടി വരും. കുങ്കുമത്തിന്റെ വിലകൂടുതലിന് കാരണം അത് വിളവെടുക്കാനുള്ള ബുദ്ധിമുട്ടാണ്.  വിളവെടുത്ത ഉടൻ തന്നെ കുങ്കുമം ഉണക്കും. തുടർന്ന്, ഒന്നോ രണ്ടോ ആഴ്ചകൾ നീണ്ടു നിൽക്കുന്ന സംസ്കരണ പ്രവർത്തനങ്ങൾക്ക് ശേഷമാണ് കുങ്കുമം വിൽപ്പനക്ക് തയ്യാറാവുകയുള്ളൂ.



ലോകത്ത് വളരെ കുറഞ്ഞ പ്രദേശങ്ങളിൽ മാത്രമേ കുങ്കുമ കൃഷി നടക്കുന്നുള്ളൂ. പക്ഷെ, നൂറ്റാണ്ടുകൾ മുൻപുതന്നെ കുങ്കുമം സുഗന്ധദ്രവ്യങ്ങളിലും, ചായങ്ങളിലും, മരുന്നുകളിലും ഉപയോഗിച്ചുപോന്നിരുന്നു. ധാരാളം ഔഷധ ഗുണങ്ങളുള്ള സസ്യമാണ് കുങ്കുമം. ഇറാനിലെയും സ്പെയിനിലെയും കുങ്കുമ പൂവിനേക്കാൾ ഗുണമേന്മ ഏറിയതാണ് കശ്മീരി കുങ്കുമ പൂവ്.


കൂടുതൽ ചിത്രങ്ങൾ

No comments:

Post a Comment

Related Posts Plugin for WordPress, Blogger...